A Lyric for Advent

  Ēalā earendel,     enġla beorhtast,
  ofer middanġeard     monnum sended,
  ond sōðfæsta     sunnan lēoma,
  torht ofer tunglas,     þū tīda ġehwane
5 of sylfum þē     symle inlīhtes.
  Swā þū, God of Gode     ġearo ācenned,
  sunu sōþan fæder,     sweġles in wuldre
  būtan anġinne     ǣfre wǣre,
  swā þec nū for þearfum     þīn āgen ġeweorc
10 bideð þurh byldo     þæt þū þā beorhtan ūs
  sunnan onsende,     ond þē sylf cyme
  þæt ðū inlēohte     þā þe longe ǣr,
  þrosme beþeahte     ond in þēostrum hēr,
  sǣton sinneahtes,     synnum bifealdne,
15 deorc dēaþes sceadu     drēogan sceoldan.
  Nū wē hyhtfulle     hǣlo ġelȳfað
  þurh þæt word Godes     weorodum brungen,
  þe on frymðe wæs     fæder ælmihtigum
  efenēċe mid God,     ond nū eft ġewearð
20 flǣsc firena lēas     þæt sēo fǣmne ġebær
  ġeōmrum tō ġēoce.     God wæs mid ūs
  ġesewen būtan synnum;     somod eardedon
  mihtiġ Meotudes bearn     ond se monnes sunu
  ġeþwǣre on þēode.     Wē þæs þonc magon
25 secgan siġedryhtne     symle bi ġewyrhtum,
  þæs þe hē hine sylfne ūs     sendan wolde.