The Kentish Hymn

Verse Indeterminate Saxon

Wuton wuldrian     weorada dryhten
halgan hlioðorcwidum,     hiofenrices weard,
lufian liofwendum,     lifęs agend,
and him simle sio     sigefęst wuldor
5uppe mid ænglum,     and on eorðan sibb
gumena gehwilcum     goodes willan.
We ðe heriað     halgum stefnum
and þe blætsiað,     bilewit fęder,
and ðe þanciað,     þioda walden,
10ðines weorðlican     wuldordreames
and ðinra miclan     mægena gerena,
ðe ðu, god dryhten,     gastes mæhtum
hafest on gewealdum     hiofen and eorðan,
an ece fęder,     ælmehtig god.
15Ðu eart cyninga cyningc     cwicera gehwilces,
ðu eart sigefest sunu     and soð hęlend
ofer ealle gescęft     angla and manna.
Ðu, dryhten god,     on dreamum wunast
on ðære upplican     æðelan ceastre,
20frea folca gehwæs,     swa ðu æt fruman wære
efeneadig bearn     agenum fæder.
Ðu eart heofenlic lioht     and ðæt halige lamb,
ðe ðu manscilde     middangeardes
for þinre arfęstnesse     ealle towurpe,
25fiond geflæmdest,     follc generedes,
blode gebohtest     bearn Israela,
ða ðu ahofe     ðurh ðæt halige triow
ðinre ðrowunga     ðriostre senna,
þæt ðu on hæahsetle     heafena rices
30sitest sigehræmig     on ða swiðran hand
ðinum godfæder,     gasta gemyndig.
Mildsa nu, meahtig,     manna cynne,
and of leahtrum ales     ðine ða liofan gescęft,
and us hale gedo,     heleða sceppend,
35niða nergend,     for ðines naman are.
Ðu eart soðlice     simle halig,
and ðu eart ana     æce dryhten,
and ðu ana bist     eallra dema
cwucra ge deadra,     Crist nergende,
40forðan ðu on ðrymme ricsast     and on ðrinesse
and on annesse,     ealles waldend,
hiofena heahcyninc,     haliges gastes
fegere gefelled     in fæder wuldre.