Riddle 33

Verse Indeterminate Saxon

Wiht cwom æfter wege     wrætlicu liþan,
cymlic from ceole     cleopode to londe,
hlinsade hlude;     hleahtor wæs gryrelic,
egesful on earde,     ecge wæron scearpe.
5Wæs hio hetegrim,     hilde to sæne,
biter beadoweorca;     bordweallas grof,
heardhiþende.     Heterune bond,
sægde searocræftig     ymb hyre sylfre gesceaft:
"Is min modor     mægða cynnes
10þæs deorestan,     þæt is dohtor min
eacen up liden,     swa þæt is ældum cuþ,
firum on folce,     þæt seo on foldan sceal
on ealra londa gehwam     lissum stondan."