The Paris Psalter: Psalm 128

Verse Indeterminate Saxon

Oft me fuhtan to     fynd on geoguðe,
cweðan Israhelas nu     eac þæt sylfe;
oft me fuhtan to     fynd on geoguþe,
ne mihton hi awiht æt me     æfre gewyrcean.
5Ofer minum bæce     bitere ongunnon
þa firenfullan     facen timbrian,
and heora unriht     eft gelengdon.
Drihten is soðfæst,     and gedeð sniome,
þæt he firenfullra     fæcne geðancas
10wis toweorpeð;     weorðað gescende
and hiora scamiað     swiþust ealles,
þa to Sione hete     swiðost hæfdon.
Wesen hi hige     her gelicast
þam þe on huses þæce     heah aweaxeð,
15þæt bið forwisnad     wraðe sona,
ær hit afohten     foldan losige.
Of þam he ne gefylleð     folme æfre,
þeah þe he hit mawe     micle elne;
ne mid his sceafe ne mæg     sceat afyllan,
20þeah þe he samnige     swiðe georne.
And þæt ne cweðan,     þa his cwide weoldan
on ofergeate     æghwær hæbben:
"Us gebletsige     bealde drihten
and ofer eow wese     eac his bletsung;
25we eow neodlice     on naman drihtnes
swylce bletsiað     bliðe mode."