The Paris Psalter: Psalm 137

Verse Indeterminate Saxon

Ic þe andette,     ecne drihten,
on minre gehygde     heortan ealre;
forðon þu ealle mine word     earum gehyrdest,
þa ic mid muðe     and mid mode cweðe,
5and on þinra engla     ealra gesihðe
ic þe singe     swiðe geneahhige.
Eac ic þin tempel     tidum weorðige,
þæt halige hus,     holde mode,
and þær þinne naman     on neod secge.
10Ofer þine þa miclan     mildheortnesse
and soðfæstnesse     samed ætgædere,
þu þinne þone halgan naman     neode gedydest,
ofer us ealle     æghwær micelne.
Swa hwylce daga     ic þe deorne cige,
15gehyr me hwætlice,     and me hraðe gedo
micle mine sawle     on þines mægenes sped.
Ealle þe andettan     eorðan kyningas,
forðon þe hi gehyrdon     hlude reorde
þines muðes     þa mæran word;
20þa on sangum     singan drihtne.
Forþon þin wuldur is     wide geond eorðan
micel and mære,     ofer middaneard
eart þu healice     ahafen, drihten;
þu eadmodra     ealra locast
25on heofonhame     her on eorðan.
Þeah þe ic on midle     manes gange,
þær me costunga     cnysdan geneahhe,
a þu me weredest     wraþum feondum
þe me woldan yrre     on acyðan;
30þu me geræhtest     recene mid handa
and me þin swyðre     sneome hælde.
Drihten for me     dome gylde,
is his mildheortnes     mycel on worulde;
ne forseoh æfre,     þæt þu sylfa ær
35mid þinum handum     her geworhtest.