The Paris Psalter: Psalm 79

Verse Indeterminate Saxon

þu þe Israela     æðelum cynne
reccest and rædest,     ðu nu recene beheald,
þu ðe Ioseph swa sceap     gramum wiðlæddest.
Ðu ðe sylfa nu     sittest ofer cherubin,
5æteow fore Effraim     eac Mannasse
and Beniamin,     nu we biddað þe.
Awece þine mihte     and mid wuldre cum,
and us hale do     her on eorðan.
Gehweorf us, mægena god,     and us mildne æteow
10þinne andwlitan;     ealle we beoð hale.
Eala ðu, mægena god,     mære drihten,
hu lange yrsast þu     on þines esnes gebed?
Tyhst us and fedest     teara hlafe,
and us drincan gifest     deorcum tearum
15manna gehwylcum     on gemet rihtes.
Þu us asettest     on sarcwide
urum neahmannum;     nu we cunnion,
hu us mid fraceðum     fynd bysmriað.
Gehweorf us, mægena god,     and us mildne æteow
20þinne andwlitan;     ealle we beoð hale.
Þu of ægyptum     ut alæddest
wræstne wingeard,     wurpe þeode
and þone ylcan ðær     eft asettest.
Þu him weg beforan     worhtest rihtne,
25and his wyrtruman     wræstne settest,
þanon eorðe wearð     eall gefylled.
His se brada scua     beorgas þeahte,
and his tanas astigun     godes cedderbeam.
Ealle þa telgan     ðe him of hlidað,
30þu æt sæstreamas     sealte gebræddest,
and hi to flodas     forð aweaxað.
Forhwan þu towurpe     weallfæsten his?
Wealdeð his winbyrig     eall þæt on wege færð.
Hine utan of wuda     eoferas wrotað,
35and wilde deor     westað and frettað.
Gehweorf nu, mægena god,     milde and spedig
þine ansyne     ufan of heofenum;
gewite and beseoh     wingeard þisne,
þæt he mid rihte     ræde gange,
40þæne ðin seo swiðre     sette æt frymðe,
and ofer mannes sunu,     þe þu his mihte ær
under ðe getrymedest,     tires wealdend.
Fyr onbærneð,     folm þurhdelfeð;
fram ansyne     egsan ðines
45ealle þa on ealdre     yfele forweorðað.
Si þin seo swiðre hand     ofer soðne wer
and ofer mannes sunu;     þu his mihta ðe
geagnadest,     ealle getrymedest,
weoruda drihten;     ne gewitað we fram ðe.
50Ac þu us wel cwica,     wealdend mihtig;
we naman þinne     neode cigeað.
Gehweorf us, mægena