The Paris Psalter: Psalm 80

Verse Indeterminate Saxon

gif þu, Israhel, a wylt     elne gehyran.
Gif þu, Israhel,     me anum gehyrst,
ne byð god on þe     niwe gemeted,
ne þu fremedne god     sylfa gebiddest.
5Ic eom þin god,     ðe geara þe
of ægypta     eorþan alædde.
Ontyn þinne muð     and ic hine teala fylle;
nele min folc mine stefne     æfre gehyran,
ne me Israhel behealdan     holde mode.
10Ac hi lifian het     lustum heortena
swa him leofust wæs,     leode þeodum,
æfter hiora willum     wynnum miclum.
Þær min agen folc,     Israhela cynn,
me mid gehygde     hyran cuðan,
15oþþe on wegas mine     woldan gangan,
þonne ic hiora fynd     fylde and hynde,
and þæt mycle mægen     minra handa
heora ehtendas     ealle fornam.
Him fynd godes     fæcne leogað;
20byð hiora yfele tid     awa to feore.
He hi fedde     mid fætre lynde,
hwæte and hunige,     þæt him halig god
sealde of stane,     oþþæt hi sæde wæron.