The Meters of Boethius: Meter 6

Verse Indeterminate Saxon

ða se wisdom eft     wordhord onleac,
sang soðcwidas,     and þus selfa cwæð:
ðonne sio sunne     sweotolost scineð,
hadrost of hefone,     hræðe bioð aðistrod
5ealle ofir eorðan     oðre steorran,
forðæm hiora birhtu     ne bið auht
to gesettane     wið þære sunnan leoht.
Ðonne smolte blæwð     suðan and westan
wind under wolcnum.     Þonne weaxeð hraðe
10feldes blostman,     fægen þæt hi moton.
Ac se stearca storm,     þonne he strong cymð
norðan and eastan,     he genimeð hraðe
þære rosan wlite,     and eac þa ruman sæ
norðerne yst     nede gebædeð,
15þæt hio strange geondstyred     on staðu beateð.
Eala, þæt on eorðan     auht fæstlices
weorces on worulde     ne wunað æfre!